Nauta inicia a tramitación para realizar achegues de area en Lavapanos coa vista posta no próximo verán
A primeira fase de rexeneración da praia da Carabuxeira encara a súa recta final. Será o 18 de xuño cando os traballos conclúan e reábrase o areal para o goce dos veciños e visitantes. Así se acordou esta mañá na reunión da comisión de seguimento da Carabuxeira na que estiveron representadas todas as administracións e entidades implicadas nos traballos: Concello, Costas, Portos, Nauta e o director de obra de Aquática Enxeñaría.
O achegue de area combina desde fai un par de semanas dous sistemas: Coa marea baixa a través de dumpers e escavadoras e coa marea alta coa draga do barco. Nos próximos días, comezarase o recheo e a colocación dos tubos geotextiles que faltan, catro, que funcionarán como dique temporal para conter o árido na praia ata a fase definitiva. A continuación, estenderase a area mediante escavadoras para configurar o perfil definitivo da praia coa totalidade da area extraída.
A valoración dos traballos foi "moi positiva" polas administracións competentes xa que se cumprirán cos dous obxectivos principais desta fase provisional: Recuperar o areal e protexer as cimentacións das vivendas lindeiras á praia.
No proxecto definitivo que xa se está tramitando súmanse outros 14.000 metros cúbicos de area e inclúese un paseo marítimo de 360 metros entre Panadeira, Lavapanos e A Carabuxeira que permitirá o tránsito peonil e o goce deste tramo de costa urbana. Neste caso substituiranse eses geotubos provisionais por unhas ramplas de mampostería, de formigón e dique, que quedarán semisumerxidas.
Durante o encontro, o alcalde, Telmo Martín, expuxo realizar achegues de area á praia de Lavapanos, que tamén presenta unha importante deficiencia de árido, antes do proxecto definitivo. Para a solución temporal para esta praia, Nauta tramitará un informe de compatibilidade de estratexias mariñas e a posterior autorización en Costas co obxectivo que a rexeneración deste areal estea listo a próxima primavera.
