21º Trofeo Hotel Carlos I Silgar
33ª Regata Ruta de Las Islas
Cun formato reducido disputarase o 7 de agosto nun trazado costeiro que circunnavegará Ons e Onza
Volve o Trofeo Hotel Carlos I Silgar - Regata Ruta de Las Islas da Clase Cruceiro a Sanxenxo
Destacada aposta do Carlos I, Concello e Club Náutico para garantir a continuidade do evento deportivo
Este próximo sábado 7 de agosto largará amarras unha nova edición dun dos grandes clásicos das regatas galegas, a cita co 21º Trofeo Hotel Carlos I Silgar, que como "Regata Ruta de Las Islas" cumpre a súa 33ª edición.
Cun formato moito máis reducido ao habitual e tras un ano de ausencia debido á pandemia, as tres partes implicadas, Hotel Carlos I Silgar, Concello e Real Club Náutico de Sanxenxo, recuperan a cita con moita ilusión e coa mirada posta en 2022 para que volva ter toda a súa esencia, como sempre foi.
Así o explicaron os representantes de cada institución que promoven a cita deportiva:
Leonardo López - Director Hotel Carlos I Silgar
"Estamos a desexar volver á normalidade, xa que o ano pasado perdemos a oportunidade de celebrar a regata que tanto nos gusta e que tanto nos motiva. Este ano recuperámola nun formato reducido con todas as medidas de seguridade, tentando seguir gozando do mar e apoiando o deporte e a Sanxenxo con todas as garantías e nunha única xornada, esperando ao próximo ano para volver ao noso formato habitual e que todo xa sexa un mal recordo".
Daniel Arousa - Concelleiro de Deportes de Sanxenxo
"Un ano máis tentamos que non se perda a tradición de realizar estes eventos en Sanxenxo, unha cita tan importante que se ve un pouco difuminada pola actual situación sanitaria, pero polo menos séguese mantendo, aínda que sexa nunha única xornada e con todas as medidas de seguridade, contando sempre con todo o noso apoio".
Fernando Casas - Directivo do Real Club Náutico de Sanxenxo
"Reitero o devandito, o Náutico encantado de volver á actividade tanto co Hotel como co Concello. Este ano debido ás restricións non vai haber recepción, cumprindo toda a normativa, e desenvolveremos a regata con todas as medidas de seguridade, esperando que o próximo ano podamos volver ao seu formato habitual".
O Comité da Regata ten previsto poder contornear ambas as illas, a de Onza e a de Ons, sempre que as condicións de mar e vento permítano. No caso oposto o Real Club Náutico de Sanxenxo ten programados ata 16 posibles percorridos alternativos.
Os vencedores da última edición, a disputada en 2019, foron en ORC 1-2, o Pairo 8, navegado por Luís Bugallo, do Real Club Náutico de Vigo, barco armado por José Luís e Constante Freire, e Bonifacio Logares, que ademais conquistaron o título galego de ORC; en ORC 3, o Raygrass III, de Ton Núñez, do Club Marítimo Carrumeiro; e en ORC 4, o primeiro posto do caixón do podio levoullo o Travesío, de Beatriz Ábalo, do Club Náutico de Vilagarcía.
O Trofeo Hotel Carlos I Silgar conta coa colaboración da Xunta de Galicia, a través da Secretaría Xeral para o Deporte, a Deputación de Pontevedra, o Concello de Sanxenxo, a Real Federación Galega de Vela e Nauta Sanxenxo.
