A procedencia da maior parte do número de visitantes nacionais é Madrid e Castela León, mentres que a nivel internacional é Francia e Portugal

 

 

Un total de 2.458 persoas visitaron durante o mes de xullo as dúas oficinas de turismo instaladas no porto deportivo de Sanxenxo e Portonovo. Unha cifra superior á rexistrada en 2020, concretamente un 45%, pero tamén un 25% máis respecto de xullo de 2019, a pesar de ser o segundo mellor ano de cifras turísticas do municipio e contar cunha oficina máis en O Vinquiño.

 

En canto á procedencia, o 95% de persoas que visitaron as oficinas o pasado mes procedían do territorio nacional, concretamente das 17 comunidades autónomas. Madrid (598), Castela León (390), Galicia (262) e o País Vasco (257) son as orixes máis repetidas entre os visitantes, pero tamén de Asturias (214) e Castela A Mancha (138). Tamén se rexistraron turistas internacionais procedentes de 18 países diferentes, pero os máis numerosos procedían de Portugal (41), Francia (32), Alemaña (16) e Italia (16).

 

Na maioría das visitas, solicitouse información sobre o municipio e lugares de interese (60,71%) e, en menor medida, de planos, viaxes a illas e rutas de sendeirismo. En canto á idade dos turistas que acudiron ás dúas oficinas de Sanxenxo, a maioría sitúanse entre 35 a 60 anos (1.054), maiores de 60 (614), menores de 18 (557) e 18 a 35 anos (233).

 

Na base de datos que realizan en Turismo de Sanxenxo recóllense datos sobre o tipo de aloxamento elixido polos visitantes que pasaron polas dúas oficinas turísticas. Así, o 46,02% aloxáronse en hoteis, o 28,4% en apartamentos e o 10 % no medio de transporte (barco, caravana ou furgoneta).