O contrato de socorristas formalizouse esta mesma semana coa empresa Salvar, Formar e Socorrer S.L.
O módulo de baños da praia de Areas Gordas que se atopa moi deteriorado polo paso dos anos e o efecto corrosivo do salitre será obxecto dunha rehabilitación integral. O Concello está a realizar nos últimos anos a mellora, así como a substitución de módulos e mobiliario dos distintos areais co obxectivo de seguir impulsando a imaxe de destino e o coidado dos servizos.
A obra, que terá un custo de 15.000 euros, consistirá na rehabilitación da estrutura de vigas de alicerces de aceiro galvanizado, a instalación do chan de táboas de madeira con lamas vinílicas e un peche de madeira. No interior do módulo colocaranse 7 inodoros, 3 espellos, 3 lavabos, 3 secamans eléctricos, 3 xaboneiras, 3 dispensadores de xel, 7 portarrollos e 7 colgadores. Tamén se instalará un cambiador de cueiros. A esta remodelación, sumaranse dous módulos novos de aseos que se instalarán nas praias de Pragueira e Foxos este mesmo verán e que supoñen un investimento de case 55.000 euros.
A posta en marcha da tempada de verán comezou xa hai meses en Sanxenxo. De feito, esta mesma semana formalizouse o contrato de socorrismo coa empresa Salvar, Formar e Socorrer, S.L. por 1,3 millóns para os próximos dous veráns. Un total de 70 efectivos entre socorristas e sanitarios encargaranse da vixilancia de praias. Este verán como novidade, ás catro praias xa habituais con socorristas a mediados de xuño (Areas, Silgar, Canelas e Montalvo) sumaranse outras dúas. Na praia de Silgar a apertura do servizo adiantarase media hora, ás 11.30, e estenderase trinta minutos máis, ata as 20.30 horas, pero só durante os dous meses de maior afluencia, os de xullo e agosto.
E esta mesma mañá abríronse as ofertas para o contrato de acondicionamento de praias para o que se presentou unha oferta e de limpeza e mantemento de aseos para o que se mostraron dúas empresas interesadas. Ambos os contratos saíron a licitación por 50.000 e 64.995 euros, respectivamente. As memorias de ambas as ofertas xa están listas para a súa valoración e está previsto que se adxudiquen nos próximos días.
