Os alumnos do CEIP Nantes recibiron esta mañá a visita da Policía Local de Sanxenxo. O oficial Manuel Parga e os axentes Emilio Martínez e Jorge Crespo acompañados do concelleiro de Seguridade Cidadá, Jaime Leiro, desprazáronse ata o centro para achegar o seu traballo diario á comunidade educativa nunha xornada de convivencia.
O mal tempo impediu que puidesen realizar unha exhibición con drons no patio do colexio, pero a pericia dos axentes permitiu que se realizasen voos no interior captando imaxes que os pequenos puideron visualizar nunha pantalla situada na entrada do centro. Deste xeito, puideron demostrar a aplicación dos drons no traballo diario da Policía.
Os axentes tamén lles ensinaron outro tipo de material de traballo como os chalecos antibalas, os cascos ou o sistema de comunicación que emprega a Policía para comunicarse.
Unha mañá diferente na que os pequenos puideron achegarse de forma lúdica e divertida ao traballo que a diario realiza a Policía Local.