Arra convértese esta fin de semana no epicentro de degustación de produtos típicos da gastronomía galega e da pintura ao aire libre coa XXII Feira Gastronómica de Produtos Galegos e o VIII Certame de Pintura Rápida. A concelleira de Cultura e Eventos, Elena Torres, e o presidente da Asociación Cultural San Cayetano de Arra, Bruno Vidal, presentaron ambas as citas esta mañá nunha das salas do Priorado de Arra. “Estamos encantados de colaborar cunha cita na que se dá unha maridaxe perfecta entre a degustación da gastronomía galega e a arte a través do certame de pintura”, explicou Torres. Unha cita que busca poñer en valor a riqueza paisaxística e cultural de Arra. Este ano contará ademais cun incremento dos premios en metálico cos que se superarán os 3.500 euros e xa se roza a trintena de rexistrados. Baixo a carpa que se sitúa nunha das chairas exteriores da praia de Montalvo poderase degustar polbo, churrasco, empanada… a prezos populares. Tamén se poderán adquirir artigos de artesanía e gozar de boa música e baile tradicional. O venres 4 de agosto, ás 12:30 horas as casetas de degustación e artesanía abrirán as súas portas. Ás 23 horas os asistentes poderán gozar coa actuación do grupo A Raíña do Vudú e discoteca móbil Studio 21. O sábado 5, ademais da degustación, dará inicio a Exposición de Artesanía Galega. Ás 13 horas oficiarase a misa cantada na capela de Arra e ás 14 horas terá lugar a actuación do grupo folclórico Soalleira. Ás 20 horas as casetas abrirán ao público e ás 22 horas comezará o VIII Serán dos Loureiros coa actuación do grupo folclórico Soalleira. Ás 23 horas, actuación do cantautor Rafa Aguín e, a partir de media noite, haberá degustación gratuíta de queimada.

O domingo 6, volverá abrir a carpa de degustación e artesanía en horario habitual. A xornada estará marcada polo Certame de Pintura Rápida como Antiga Parroquia. A inscrición poderá realizarse no correo Este enderezo de correo está a ser protexido dos robots de correo lixo. Precisa activar o JavaScript para velo. ou o mesmo día na tixola de Montalvo na selaxe de lenzos, de 9 a 11 horas. Estableceranse dúas categorías, unha de adultos con tres premios, e unha infantil con dous premios por dúas franxas de idade, ata 12 anos, e de 13 a 16 anos. Tamén se repartirán dous premios entre os dous mellores Artistas da Comarca que participen no certame. A entrega de premios celebrarase a partir das 19 horas no Priorado de Arra. Dous artistas gañadores en edicións anteriores do concurso poñerán á venda as súas obras. Trátase de Isabell Seidel e Manuel Carballeira.