Unha delegación de 27 maiores do programa de Actividade Física e Deporte para a terceira idade do Concello de Sanxenxo participarán os próximos 2, 3 e 4 de outubro nas Olimpíadas deportivas de Viana do Castelo. Desde hai xa varios anos, Sanxenxo forma parte dun proxecto da Comunidade Europea xunto á Universidade de Vigo, “In Common Sports”, no que participan Portugal, Hungría, Italia, Bulgaria e España. Sanxenxo representará a España nos xogos cos seus 27 deportistas. Os xogos contemplan dúas grandes áreas, os xogos deportivos universais (Voleibol, baloncesto, atletismo, fútbol e natación) e os xogos tradicionais (Petanca, malla, corda). Este ano, inclúen, por primeira vez, a modalidade Remo Indoor. O programa está financiado polo programa europeo Erasmus+ Deportes e coordinado pola Cámara Municipal de Vila Nova de Cerveira. Un dos propósitos deste proxecto é coñecer a motivación que se xera nas persoas maiores a través da competición, o que leva á posta en marcha de deportes adaptados.