O axente Abelardo Martínez participará co Poli Paco nun curso sobre “A educación viaria para educadores e docentes” que se celebrará os días 26 e 27 de outubro en horario de 16 a 21 horas na sede da UNED de Ourense. Baixo o título, “O uso das antigas tecnoloxías ao servizo da Educación Viaria”, Martínez impartirá un taller demostrativo cos seus monicreques, entre eles o Poli Paco. “Non fan faltan as novas tecnoloxías para captar a atención dun neno e ensinarlle educación. Cun simple monicreque de toda a vida podes facerlles chegar a mensaxe”, explica. Ao longo destes anos, Martínez conseguiu tecer unha rede de as expertos en seguridade viaria que colaboran coa difusión da mensaxe nas súas casas e cos seus familiares dentro e fóra do municipio. Unha forma de ensinar diferente que lle fixo merecedor de distintos galardóns e premios como o Ponle Freo e mesmo a ter un circuíto viario co nome de “Poli Paco” non só en Sanxenxo senón tamén en Mairena de Aljarafe. “É fundamental que desde os primeiros anos do neno ou da nena empécese ensinando educación viaria. De feito, sería moi positivo que nos colexios houbese unha formación específica”, incide. O congreso está organizado por Raúl González Fernández, doutor do Departamento de Didáctica, Organización Escolar e Didácticas Especiais na Facultade de Educación; conta coa colaboración da Federación Estatal de Técnicos de Educación Viaria (Fetevi) e a Xefatura Provincial de Tráfico de Ourense. Falarase da importancia do rol da Educación Viaria no ámbito institucional e como poder impartir unha charla ou realizar unha actividade nunha clase nun centro nas diferentes etapas educativas. Preténdese achegar a Educación Viaria a diferentes colectivos como docentes, educadores sociais, pedagogos, membros de Protección Civil, diferentes Corpos de Seguridade e a calquera cidadán interesado. Para iso, Benito Bouzada Blanco, Garda Civil de Tráfico e membro de Fetevi) e da Asociación de Técnicos de Educación e Seguridade viaria en Galicia (Atesugal), falará sobre “O rol da Educación Viaria pola Seguridade viaria”. O presidente de Fetevi e subinspector da Policía Local de Santa Eularia deas Riu (Ibiza), José López Muñoz, fará ver que “A Educación Viaria é unha necesidade”. De “O papel dos medios de comunicación #ante a Educación Viaria” falará Javier Pérez Mouro. María Elisa Abad Suárez profesora no CPR Cardeal Cisneros de Ourense, relatará “Experiencias docentes na educación viaria”. David Llorente Rey, xefe provincial da DXT, disertará sobre “Pasado, Presente e Futuro da Educación Viaria desde a DXT”. Pola súa banda, Silvia Castro Rodríguez, oficial da Policía Local na Coruña e pedagoga, analizará “Deseño e implementación de programas de Educación Viaria”. O obxectivo é achegar e dar a coñecer a Educación Viaria nas súas diferentes vertentes, dar resposta a como levala á práctica desde diferentes enfoques como o pedagóxico, o da docencia, incluso o psicosocial pola variedade de problemas sociais que carrexan certos hábitos, condutas na Seguridade viaria e sen esquecer que a Educación Viaria é cousa de todos, como unha das facetas de responsabilidade de cada un de nós.