Un voo fotogramétrico detalla a cantidade de árido desprazado polos efectos dos temporais deste inverno

O Concello de Sanxenxo moverá, durante o mes de maio, 9.580 m3 de area na praia de Silgar co obxectivo de recuperar o perfil orixinal do areal. Esa é a cantidade de árido desprazado, segundo voo fotogramétrico, desde a zona este a o oeste da praia polos efectos dos temporais do inverno. Para iso, traballarase nunha zona da praia cunha superficie aproximada de 17.000 m2 para mover máis de 9.000 m3 de area.

No proceso de mantemento desta praia, extraerase area con retroexcavadoras para desprazala ao extremo do areal, á altura da Madama de Silgar, pero na parte seca. Para o seu traslado a zonas que necesiten ser engordadas con árido, cargarase o material en dúmpers motovolquete e, tras o seu baleirado, a area será distribuída e estendida coa colaboración dunha pa mixta.

Os traballos, que se realizarán durante o mes de maio cando o árido xa está asentado e as mareas permiten actuar, sairán a concurso cun orzamento que roldará os 100.000 euros e un prazo de execución de 20 días. Antes do inicio da obra quedarán definidos e executados o cerramento perimetral da praia na contorna das obras, os accesos a ela e as delimitacións exteriores.

A recuperación do perfil da praia permitirá gozar dunha maior superficie do areal e deixará libres as ramplas de acceso agora cubertas en até un metro de altura de árido.

Para efectuar estes traballos será necesario contar cos permisos pertinentes de Costas do Estado.

Doutra banda, nos próximos días concluirán os traballos de canalización das subministracións eléctricas para dotar á praia de Silgar de dez puntos wifi gratuítos, dez cámaras de cálculo de persoas a través de dispositivos móbiles e unha cámara panorámica que permita ver en directo o estado do areal este verán.