Un total de 19 traballadores encárganse de realizar os traballos de forma manual e coa axuda de tractores desbrozadores

Sanxenxo, 28 de xuño de 2024.- O Concello de Sanxenxo conta desde maio cun importante reforzo de traballadores no departamento de Obras e Servizos, dirixido por Yago Torres, con contratos que, nalgunhas áreas como rozas, xardíns e obras finalizarán, en determinados casos, a mediados de novembro con contratos de ata seis meses. O persoal conformado na actualidade por 56 traballadores repártese entre mantemento de xardíns, obras e servizos, praias e rozas no rural.

Pero é a área de rozas a que experimenta un maior incremento tanto de persoal como de medios cun total de 17 operarios e dous tractores desbrozadores. O traballo divídese por cuadrillas que traballan de forma simultánea polo rural do sete parroquias. Tamén a área de xardíns debido ao incremento destes espazos nos últimos anos no municipio aumenta até os 16 operarios.

Doutra banda, desde o Concello de Sanxenxo ínstase os propietarios de parcelas particulares a mantelas nas condicións de seguridade, salubridade, accesibilidade e ornato, tal e como indica a lei 2/2008 do 10 de Lei do Chan de Galicia. As sancións por incumprimento van desde os 1.000 até os 10.000 euros.