3.491 viaxeiros utilizaron o transporte público ata o sábado 6 de xullo, dos que 381 corresponden á lanzadeira entre o parque empresarial e as vilas de Portonovo e Sanxenxo.

Sanxenxo, 9 de xullo de 2024.- As liñas de transporte público urbano que recentemente puxo en marcha Sanxenxo están a incrementar a demanda ao ritmo que se podía intuír. O sábado 22 estreouse o servizo cuns datos moi baixos, non podía ser doutra maneira no primeiro día. Un total de 49 viaxeiros, dos que só un utilizou o servizo da lanzadeira.
Dúas semanas despois, en concreto este sábado 6 de xullo, houbo un total de 454 viaxeiros, dos que 66 correspondían á lanzadeira. O crecemento foi significativo e esperamos siga a tendencia ata finais deste mes para logo manterse no mes de agosto e os primeiros días de setembro.
Ata canto pode crecer o número de viaxeiros? Non o sabemos, pero a evolución das dúas primeiras semanas apunta a cifras superiores a final de mes que justifican a posta en marcha deste servizo. Desde o primeiro momento o goberno tivo claro que a liña circular (16 percorridos de ida e 16 de volta diarios) con 29 paradas ía ter unha demanda superior porque percorre as zonas de maior poboación (veciños e turistas) así como as praias máis visitadas.
A valoración do servizo da lanzadeira é distinta á liña circular. Non depende só do número de viaxeiros, tamén da necesidade que ten Sanxenxo de ofrecer a calquera visitante a posibilidade de atopar sempre un lugar onde poder aparcar e desprazarse en poucos minutos ao centro das vilas de Sanxenxo e Portonovo.
A valoración do alcalde, "estamos moderadamente satisfeitos da evolución das dúas primeiras semanas, pero debemos esperar a setembro para poder sacar unha conclusión xeral do servizo".