Os axentes atenderon máis de 8.000 chamadas no que vai de ano nas que se solicitaba axuda, información ou se denunciaba algún caso.

Sanxenxo, 19 de decembro de 2024.- Os accidentes de tráfico aumentaron no que vai de ano un 5% respecto aos rexistrados durante 2023. Así, a Policía Local de Sanxenxo interveu en 281 accidentes, aínda que a maioría deles non revestían gravidade. O balance tamén reflicte 28 atestados penais por conducir baixo os efectos do alcol ou drogas, por condución temeraria, agresións ou ameazas. Neste contexto, cobran especial importancia as campañas e controis preventivos (12) realizados ao longo do ano e en períodos concretos.

En canto ás denuncias de tráfico, a Policía Local tramitou 4.844, unha cifra lixeiramente superior á rexistrada no pasado ano, 4.606; e 81 denuncias administrativas por incumprir a Lei de Seguridade Cidadá en casos como desacato á autoridade, agresión, violencia ou alteración da orde pública. A presenza de animais na estrada, vivos ou mortos, tamén requiriu a presenza policial ata en 52 ocasións, e as avarías ou anomalías na vía pública, en 198 ocasións.

En canto aos obxectos perdidos, rexistráronse un total de 648, dos que 262 puideron ser entregados aos seus donos. A maioría dos obxectos son carteiras con diñeiro en efectivo, chaves, xoias e documentación, e mesmo maletas con roupa e mochilas que se almacenan na xefatura de Miraflores.

A Policía Local de Sanxenxo conta cunha plantilla de 22 axentes que se reforza durante o verán e presta servizo as 24 horas durante os 365 días do ano.