Sanxenxo, 16 de decembro de 2024.- O pavillón de Baltar acolleu onte unha masterclass dirixida a persoas maiores á que asistiu un grupo de alumnos do Grao en Ciencias da Actividade Física e o Deporte da Universidade de Vigo. A actividade, organizada dentro do programa de Educación Física para Maiores da Concellería de Servizos Sociais e Maiores dirixida por Paz Lago, estivo coordinada polo técnico municipal Nacho Rebollo e contou coa participación de máis de 150 maiores.
Durante a masterclass, os alumnos de último curso tiveron a oportunidade de observar, participar e aprender como adaptar as actividades físicas ás necesidades e capacidades das persoas maiores. A sesión incluiu exercicios baseados en tarefas duales (físicas e cognitivas) centradas nas capacidades condicionais, coordinativas e memorísticas a curto e longo prazo, deseñadas especificamente para mellorar a calidade de vida dos participantes. Os alumnos matriculados na materia de Novas Tendencias de Exercicio Físico en persoas maiores con ou sen patoloxías asistiron acompañados pola concelleira de Servizos Sociais e Maiores, Paz Lago, e os docentes José Mª Cancela e Rosana Fernández, responsables da materia. Ambos destacaron a sesión enriquecedora, na que os estudantes non só adquiriron coñecementos prácticos valiosos, senón que tamén interactuaron e compartiron experiencias cos asistentes, creando un ambiente agradable de aprendizaxe mutua.
Esta actividade, que busca fomentar a saúde, a actividade física e o benestar na terceira idade, foi moi ben recibida polos participantes, que expresaron o seu entusiasmo polas actividades e a importancia de manterse activos. Pola súa parte, os alumnos resaltaron a relevancia deste tipo de iniciativas na súa formación profesional, así como o impacto positivo que o deporte pode ter na vida das persoas maiores.
Lago reafirmou o seu compromiso coa promoción da actividade física e o benestar de todos os seus cidadáns maiores de 65 anos, e agradeceu á Universidade de Vigo, en especial ao profesor José Mª Cancela, a súa colaboración e compromiso co Concello de Sanxenxo no desenvolvemento de actividades orientadas a este colectivo.
