Xogadores de toda España e Portugal daranse cita nun evento no que se repartirán 2.200 euros en premios
Sanxenxo, 26 de setembro de 2025.- O xadrez volve ocupar un lugar protagonista no panorama deportivo do municipio coa celebración do Torneo Sub-2200 Masters de Sanxenxo, que terá lugar esta fin de semana no pavillón de Nantes. Esta competición reunirá a xogadores procedentes de Galicia, diferentes comunidades autónomas e Portugal, nunha cita que promete emoción, nivel competitivo e unha impecable organización.
O torneo, reservado a deportistas cun Elo inferior a 2200, consolidouse como unha das competicións máis atractivas do calendario xadrecístico do noroeste peninsular. Con 2.200 euros en premios e un deseño técnico pensado para potenciar a calidade de xogo, o evento desenvolverase en Sanxenxo, como municipio que continúa apostando polo xadrez como motor cultural e deportivo.
A organización corre a cargo do Club Xadrez Cum Laude Sanxenxo, unha entidade fondamente comprometida coa difusión do xadrez no ámbito educativo e interxeracional, e conta coa colaboración do Concello de Sanxenxo. O club imparte clases en centros escolares e ofrece formación a persoas de todas as idades, fomentando o pensamento estratéxico, a concentración e os valores do deporte mental.
Á fronte do proxecto está José Manuel Prol Lusquiños, adestrador, monitor nacional e organizador do torneo, quen ademais exerce como docente de xadrez na Universidade Nacional de Educación a Distancia (UNED). O seu labor foi clave na profesionalización desta cita e na promoción do xadrez como ferramenta formativa e social. Durante estas xornadas, o torneo ofrecerá partidas de gran nivel, creando un espazo de convivencia para xogadores, familias e amantes do xadrez. Máis alá da competición, o evento preséntase como unha experiencia integral que combina deporte, cultura, educación e turismo, todo nun entorno privilexiado como é Sanxenxo.
A cerimonia de clausura e entrega de premios celebrarase o domingo 28 pola tarde, coa presenza de representantes institucionais e público afeccionado. O Torneo Sub-2200 Masters de Sanxenxo reforza así a súa posición como unha cita imprescindíbel dentro do circuíto nacional, e como exemplo de como o xadrez pode transformar e inspirar comunidades enteiras.
