Sanxenxo, 6 de novembro de 2025.- Sanxenxo será escenario este sábado, 8 de novembro, do III Campionato de Pesca a Fondo dende Embarcación, organizado polo Club de Pesca Maragota en colaboración co Club Náutico Portonovo, a Confraría de Pescadores e o Concello de Sanxenxo. A proba reunirá 36 barcos e arredor de 110 participantes, superando as inscricións da edición anterior. O evento deportivo foi presentado nas instalacións do Club Náutico de Portonovo, co concelleiro de Deportes e Xuventude, Marcos Guisasola.
As embarcacións competirán na zona delimitada da Ría de Pontevedra, coa presenza de equipos procedentes de Bueu, Vigo, O Grove, Combarro, Portonovo, Beluso, Vilanova, Cambados ou Raxó, entre outros.
Ademais da clasificación xeral, con premios ata o 10º posto, establécense 4 recoñecementos especiais:
• Premio Peza Maior
• Premio Júnior (menores de 12 anos)
• Premio Sénior (maiores de 65 anos)
• Premio “Maragota Maior”
O evento inclúe tamén unha homenaxe a Toño “Barco Covaso”, figura importante no ámbito da pesca local, así como sorteos de material deportivo e náutico durante o xantar de confraternidade entre participantes e público.
O campionato supera os 6.000 € en premios, grazas á colaboración de empresas do sector como BAITRA, GARMIN e Electrónica Ría de Vigo, entre outras, que achegan material, equipos e agasallos para as tripulacións.
