Creacións Luminosas é a firma proposta para encargarse do alumado dos espazos públicos do municipio durante as festas

Sanxenxo, 6 de novembro de 2025.- Río Producións e Servizos Integrais son as dúas empresas que optan á montaxe e aluguer da gran carpa que o Concello ten previsto colocar na Praza do Mar para convertela nun Pazo de Nadal. A instalación, que saíu á licitación por 89.903 euros, terá forma de iglú, catro espazos diferentes repartidos en 2.100 metros cadrados e 30 metros de ancho.

O obxectivo é que nesta carpa se xunten moitas das actividades festivas, así instalarase un mercadiño de Nadal, unha área de xogo e lecer, un espazo gastronómico con diferentes foodtrucks e unha zona para actuacións e actividades. A Concellaría de Cultura e Eventos, que dirixe Elena Torres, prevé que o espazo permaneza aberto desde o 5 de decembro ata o 6 de xaneiro.

A estrutura deberá contar con perfilería de aluminio anodizado e pechamentos a base lona ignífuga transparente ou de cor branca con acreditación de Certificado de Ensaio de Laboratorio Oficial Homologado. Ademais, valorarase especialmente a estética do deseño da carpa no seu conxunto, que inclúe o chan a base de tarima de madeira sobreelevada provista de enmoquetado antiescorregadizo e iluminación ambiente a base de luces led. Do mesmo xeito, a adxudicataria deberá dispoñer de persoal técnico competente durante todo o período de funcionamento da carpa e das súas instalacións, capacitado para realizar labores de mantemento e control.

Alumbrado

Por outra banda, o Concello xa dispón de proposta de adxudicación para o alumado de Nadal en espazos públicos. Trátase de Creacións Luminosas, única licitadora, que ofertou a decoración lumínica por 175.450 para este ano. En total, colocaranse 345 motivos de alto valor estético, fabricados en estruturas de aluminio, que se repartirán en 84 espazos diferentes das sete parroquias do municipio. A instalación deberá estar equipada con tecnoloxía de alta eficiencia 100% led e equipos homologados.