Sanxenxo, 7 de novembro de 2025. – O Salón de Plenos do Concello de Sanxenxo acollerá o próximo mércores, 12 de novembro, a partir das 20:00 horas, a presentación do libro «Entre los muros del olvido», escrito polo xornalista Juan de Sola na que estará acompañado do alcalde, Telmo Martín. Un libro que rescata a historia persoal e colectiva dun veciño de Pontevedra que sobreviviu aos horrores do campo nazi de Mauthausen.
“Entre los muros del olvido” narra a vida de Ramón García Martínez, un supervivente do campo de concentración de Mauthausen. Nacido no pobo de Purchena (Almería), e pontevedrés de adopción, a súa existencia estivo marcada pola loita constante contra a adversidade. Juan de Sola reconstrúe a súa historia neste volume e rescata do esquecemento a memoria persoal e colectiva dun home que foi exemplo de superación e de loita contra as adversidades. “Aplicou unha aprendizaxe fóra de serie para responder con capacidades positivas ante a máis desventurada das adversidades”, comeza explicando o autor do libro.
Tras unha nenez en Almería e a emigración a Barcelona, sobreveu o exilio tras loitar no bando perdedor da Guerra Civil española ata que, durante a Segunda Guerra Mundial, é deportado a Mauthausen. Alí, en medio de condicións inhumanas, traballos forzados e sufrimento extremo, Ramón atopa forzas nunha relación sentimental prohibida e nun inesperado reencontro familiar, que lle permiten resistir e manter viva a esperanza. En 1945, tras finalizar o conflito bélico e producirse a liberalización dos campos de concentración, logra converterse nun dos superviventes do holocausto. Anos despois de recuperar a liberdade, decide poñer rumbo a Arxentina, onde conecta e acaba sentimentalmente vinculado coa emigración galega nese país.
A novela combina o drama histórico cunha crónica íntima de superación, destacando valores como a solidariedade, a memoria e a resiliencia humana. Para chegar ao obxectivo de publicar “Entre los muros del olvido”, o autor precisou de anos de labores de investigación, viaxes aos lugares e contextos onde se desenvolven os diferentes escenarios co único fin de contar unha historia, baseada en feitos reais, que permitise contribuír á memoria colectiva ante a ameaza dun esquecemento aliado co pasado máis sinistro. Recordar non só evita repetir os mesmos ou idénticos erros, senón que tamén concede a oportunidade de protexer o futuro das novas xeracións.
