A facturación do parking Nauta alcanzou unha subida de máis do 20% respecto ao mesmo mes de 2024

Sanxenxo, 7 de novembro de 2025. – Sanxenxo mantén o seu pulso ao desemprego mellorando mes a mes as cifras rexistradas en anos anteriores. Un comportamento que se mantén estable desde hai dous anos e que o pasado mes de outubro volveu repetirse con 459 desempregados. Un dato que supón 83 menos que o mesmo mes de 2024 e 115 menos, que en 2023.

O número de desempregados de outubro en Sanxenxo significa unha taxa de paro do 5,7%, un bo dato en plena tempada baixa. “Estamos moi contentos con estes datos e traballamos para seguir poñendo as mellores condicións para a xeración de emprego e riqueza para as familias do noso municipio”, asegura Telmo Martín, alcalde de Sanxenxo.

Outro indicador da actividade económica do municipio é o parking Nauta Sanxenxo que o pasado mes de outubro rexistrou unha facturación de 34.846 euros, un 20,4% máis que en outubro do 2024. O dato supón tamén a mellor cifra do décimo mes do ano desde a súa apertura, pese a que en outubro xa estaban funcionando as 2 horas gratis para veciños con vehículos censados en Sanxenxo. A estancia media por vehículo foi dunha hora e polo parking público pasaron 9.387 coches.

As instalacións do aparcadoiro de Nauta, situado na entrada do porto deportivo, dispoñen de 584 prazas. Estas distribúense en tres espazos diferenciados: 206 prazas na planta pública interior; 178 no parking privado que existe no mesmo recinto; e outras 200 no aparcadoiro en superficie na Praza do Mar e ao que se accede desde a rotonda do porto.