A actuación crea un paseo desde Silgar ata o miradoiro de punta Vicaño polo litoral e renova completamente a pasarela da praia de Baltar

Sanxenxo, 7 de novembro de 2025. – O Concello acometerá unha importante mellora do litoral das vilas de Sanxenxo e Portonovo. Unha actuación valorada en 1.799.995 € que o Concello presentou ao Plan Extra da Deputación de Pontevedra co obxectivo de financiala ao 50% entre ambas administracións.

A actuación é dobre, por unha banda, créase unha senda polas rochas desde o paseo de Silgar ata o miradoiro do parque de punta Vicaño. En segundo lugar, o proxecto inclúe a substitución completa da pasarela da praia de Baltar e a mellora do seu sistema dunar.

Silgar e Baltar son praias únicas por razóns diferentes. Silgar é unha praia urbana, moi recollida e agradable para pasear durante todo o ano. A súa importancia na orixe e o crecemento turístico de Sanxenxo está fóra de calquera dúbida. A praia de Baltar é unha xoia natural, pois trátase do único areal urbano da ría de Pontevedra que conserva un sistema dunar. Dúas praias urbanas moi distintas pero que se complementan e que, a partir desta actuación, gañarán atractivo e estarán comunicadas, especialmente, para os miles de veciños e visitantes que pasean entre o Paseo de Silgar e Rafael Picó.

O proxecto actúa ao longo de 1.622 metros divididos en 3 zonas:

Zona 1 cor vermella na imaxe que se xunta.
• Tramo de 374 metros e 3 de ancho que, por primeira vez, transcorre ao bordo do mar entre o paseo de Silgar e o miradoiro de Punta Vicaño. Ao tratarse da zona de maior dificultade (rochas) instalarase unha plataforma de composite sobre micropilotes e inclúe barandas de aceiro, balizas e proxectores de luz.

Zona 2 cor azul
• Tramo de 614 metros entre o miradoiro de punta Vicaño e o acceso á praia de Baltar. Nesta zona a intervención é menor, consiste na reparación dos puntos deteriorados da senda que atravesa o parque de Punta Vicaño e a creación de algún tramo novo do vial e acceso á praia de Baltar.

Zona 3 cor verde
• Substitución de toda a pasarela de 634 metros con balizas e proxectores de luz. Tamén están previstas actuacións para conservar e facilitar o crecemento da duna, como a elevación da nova pasarela de madeira para evitar que esta impida o crecemento da duna como ocorre agora.

En definitiva, o proxecto é moi respectuoso co medio, á vez que, humaniza, embelece e mellora a accesibilidade do tramo máis transitado do Sendeiro Azul que vai desde a punta do espigón do porto deportivo de Sanxenxo á praia de Caneliñas en Portonovo (8 km)