O concelleiro de Medio Ambiente, Mantemento e Servizos, Yago Torres, visitou recentemente a actuación

Sanxenxo, 10 de novembro de 2025.- As obras do novo peche perimetral do Punto Limpo de Sanxenxo avanzan coa construción dun muro de contención e a mellora da canalización de pluviais do Punto Limpo “As Cereixeiras”. O concelleiro de Medio Ambiente, Mantemento e Servizos, Yago Torres, visitou recentemente a actuación que está a ser executada pola empresa Caldevergazo. En canto ao orzamento, terá un custo total de 82.038 euros e conta cunha axuda de fondos europeos que ascende a 73.443 euros.

O peche perimetral das instalacións atópase nun importante estado de deterioro con zonas onde se desequilibran os postes de sustentación da malla do peche existente.

Na fronte da parcela existe un desnivel entre os terreos que afecta á zona de acceso, e por este motivo, considérase a necesidade de realizar un pequeno muro de contención dos terreos para evitar caídas cara á propiedade lindante e que se deteriore a plataforma horizontal que serve de aparcamento e acceso.

Polo seu lindeiro este, existe unha propiedade a cota superior que en épocas de choivas ocasionan entradas de auga cara a estas instalacións, polo que se expón a posibilidade de realizar unha pequena canalización superficial para reconducir estas augas pluviais cara á rede de evacuación de augas e evitar a entrada das mesmas nestas instalacións.