A actividade é gratuíta e está dirixida a mozos de entre 12 e 18 anos

Sanxenxo, 10 de novembro de 2025.- A Casa Mariñeira de Don Fernando acollerá o próximo 22 de novembro, de 11 a 13 horas, o obradoiro ¿Como se fai un manga? A actividade inclúese no ciclo Xuventude en Viñetas, promovido pola Deputación de Pontevedra, a través do Servizo de Xuventude e Reto Demográfico, é gratuíta e con prazas limitadas. O fío condutor será a vida na provincia.

Esta iniciativa busca fomentar os intereses artísticos dos mozos da provincia de entre 12 e 18 anos, promover a creatividade como unha ferramenta de expresión persoal e ofrecer un lecer saudable e alternativo. Os participantes deberán levar papel, lapis, goma, bolígrafos e rotuladores.

O obradoiro terá un contido teórico (30 minutos) onde se abordará a historia do manga e autoras e autores relevantes; os xéneros (kodomo, shojo, shonen, seinen e josei); estilos e a simplificación do corpo humano; e estruturas narrativas (a viaxe do heroe, a estrutura clásica e os personaxes). Ademais, haberá un proceso técnico no que se abordará a composición dun storyboard, o coloreado (tradicional/dixital) e o uso de bocadillos e textos.

A actividade concluirá cun exercicio práctico (1,5 horas): “Crea unha páxina de manga futurista na túa localidade” no que haberá que realizar un deseño dun escenario futurista baseado no municipio e crear un personaxe principal con deseño manga.