Ambas empresas municipais xerarán os seus propios recursos para financiar actuacións estratéxicas, sen coller un euro dos veciños.
Sanxenxo, 21 de novembro de 2025.- O Orzamento de 2026 vai permitir ao goberno aproveitar o potencial das empresas municipais Nauta e Ínsula para impulsar estratexias de xestión pública que xa demostraron ser un éxito. En 2002 a compra da concesión do porto deportivo e as obras supuxeron o investimento de 15 M€ que Nauta autofinanciou coa explotación dos locais comerciais, as prazas de aparcamento e os amarres.
Nauta creou unha serie de equipamentos, como o aparcadoiro, a Praza do Mar e o malecón entre outros, que foron imprescindibles para o desenvolvemento turístico de Sanxenxo sen ter que coller un euro dos veciños. A ampliación da concesión de Nauta ata o ano 2047 permítenos financiar novas melloras do porto deportivo repetindo a estratexia que tan bo resultado deu en 2002.
O modelo de xestión que funcionou en Nauta vai servir tamén para que Ínsula, empresa pública que xestiona o solo municipal, poida facilitar aos mozos o acceso á súa primeira vivenda.
Nauta e Ínsula van poñer en marcha cinco actuacións:
- O umbráculo da Praza do Mar de 2.000 m2 (6,4 M€), peza principal do proxecto que gañou o concurso de ideas do porto deportivo. Un espazo cuberto para eventos que Sanxenxo necesita para dar un salto de calidade como destino turístico, con capacidade para miles de persoas e sen depender da climatoloxía.
- A mellora da capitanía, o bulevar dos locais, os pantaláns e outras instalacións náuticas e pesqueiras. (17 M€)
- O aparcadoiro de San Roque de Portonovo (1,5 M€) nuns terreos que se compraron o verán pasado nos que se vai construír un aparcadoiro de 60 prazas.
- A urbanización do PEI 17 (1,5 M€), un solo de 4.700 m2 xunto á igrexa de Sanxenxo con capacidade para 40 vivendas públicas.
- A compra de novo solo urbanizable (3,5 M€) para a construción de vivenda pública.
Algunhas destas actuacións van requirir máis dun ano. O obxectivo é poñelas en marcha en 2026, pero dada a súa envergadura e complexidade, prolongaranse en 2027 e incluso, nalgún caso, ata 2028.
