O edificio acollerá a oficina de Medio Ambiente e a sede da organización de ornitoloxía SEO BirdLife.
Sanxenxo, 21 de novembro de 2025.- A rehabilitación integral do edificio do Centro de Interpretación de A Telleira comezou esta semana coa colocación dunha barreira impermeable do edificio desde a cimentación co obxectivo de mellorar o illamento e evitar a entrada de humidades. A actuación finánciase a través dos fondos Next Generation, ten un custo de 759.940 euros e un prazo de execución de seis meses.
O edificio, construído en 2003, conta cunha superficie de 2.504 metros cadrados. Un dos obxectivos é mellorar a eficiencia enerxética do edificio mediante a compartimentación espacial interior para unha climatización independente, a instalación de sistemas de ventilación e climatización adaptados a criterios de máxima eficiencia; mellora dos sistemas de illamento e drenaxe e a optimización da iluminación con tecnoloxías de baixo consumo.
Ademais, ordenarase a parcela circundante para crear un pequeno aparcadoiro acoutado, evitando a dispersión actual de vehículos. A redistribución do espazo interior incluirá a oficina de Medio Ambiente, a sede de SEO BirdLife, unha sala de exposición permanente (843 m²), unha sala multiusos (53,56 m²), un espazo para obradoiros de interpretación (132 m²), un almacén (116 m²), un centro de documentación (76 m²), unha sala audiovisual (85 m²), unha sala de exposición itinerante (196 m²), unha tenda temática (25 m²) e aseos.
O edificio sitúase nunha parcela de 22.986 metros cadrados e limita cunha das lagoas de Rouxique. A zona conta con relevantes figuras de protección. Forma parte da Rede Natura 2000, é Lugar de Interese Comunitario (LIC), está protexida polo convenio internacional Ramsar de humidais e é Zona de Especial Protección para as Aves (ZEPA).
Por iso, o obxectivo é que o Centro de Interpretación de A Telleira se converta nun foco de difusión dos valores ecolóxicos e etnográficos de toda a zona que fomente o turismo ambiental e ornitolóxico, especialmente nos meses de outono e inverno cando máis de 200 especies de aves elixen este humidal para invernar.
