Organizaranse en brigadas polas distintas parroquias para manter en estado óptimo o municipio

Sanxenxo, 9 de xaneiro de 2026.- O Concello de Sanxenxo adianta o reforzo de persoal do departamento de obras, xardíns e limpeza viaria. O departamento de Medio Ambiente, Mantemento e Servizos, dirixido por Yago Torres, incorporará nos próximos días dez novos operarios. O obxectivo é a posta a punto das distintas parroquias tanto en pequenas obras como no acondicionamento de camiños, xardíns e limpeza viaria.

Con este reforzo, o Concello organizará brigadas de ata tres operarios polas sete parroquias do municipio que se encargarán de acometer estas tarefas. En concreto, á área de obras incorporaranse 3 efectivos, 4 á limpeza viaria e 3 a xardíns e espazos públicos. En total, haberá xunto ao cadro de persoal habitual, 20 efectivos.

Con este reforzo búscase garantir que a conservación e a limpeza do municipio sigan o ritmo das novas infraestruturas proxectadas para este ano. Así, no mes de abril está previsto que se sumen outros 10 operarios de cara á campaña estival e os respectivos efectivos do Plan +Provincia da Deputación de Pontevedra.

Ademais, o Concello vén de adquirir unha hidrolimpadora, por un importe de case 14.000 euros, con mangueira de alta presión, lanza, kit de limpeza e remolque con capota cun depósito de 400 litros para realizar limpezas de prazas, lavadoiros e espazos públicos en xeral. Trátase dun equipo autónomo especialmente útil en lugares sen acceso a tomas de auga ou electricidade, así como para a limpeza de grafitis ou a eliminación de musgo.