Hoxe iniciáronse os traballos para dotar á praia de Area de Agra dunha nova pasarela que mellorará a accesibilidade ao areal
Sanxenxo, 13 de xaneiro de 2026.- A praia de Pragueira contará esta tempada cunha nova pasarela de acceso ao módulo de Salvamento e Socorrismo cun posto de control e vixilancia integrado. A Concellería de Turismo e Praias, dirixida por Juan Deza, realizou un investimento que roldou os 7.000 euros procedentes de fondos municipais.
A pasarela conta con madeira antiescorregadiza de 2 metros de ancho por 6,3 de longo, facilitando o acceso seguro á zona de socorrismo. Ademais, a nova torre integrada na zona, en forma de pérgola de madeira de piñeiro e un mastro de aceiro inoxidable, conta cunha escaleira tamén de piñeiro tratada para resistir as condicións da contorna costeira.
A posta a punto dos areais de Sanxenxo, coordinada polo concelleiro de Turismo e Praias, continuou esta mañá na praia de Area de Agra cun novo acceso ao areal formado por unha pasarela de dous tramos e meseta para xiro de 180º, trazada paralelamente ao muro de contención existente. Contará con soportes pilotados, plataforma e varanda. A nova plataforma permitirá cumprir coa normativa de accesibilidade vixente.
Cómpre lembrar que, na praia de Canelas, realizouse recentemente unha mellora integral dos accesos. Substituíuse a antiga pasarela provisional por unha estrutura fixa, lixeiramente elevada sobre a area, que permite o avance natural da duna baixo a mesma. Tamén se abordou o problema dos arrastres provocados pola auga da chuvia, coa instalación dunha reixa transversal de recollida de augas pluviais conectada a un pozo xa existente.
A nova pasarela de Canelas, de 40 metros de lonxitude, conecta o acceso principal coa caseta de baños e servizos, e inclúe unha rampla desmontable de 7 metros cadrados cuxo material foi reservado para a súa futura reutilización. Ademais, instalouse un sistema de iluminación LED con tiras de 50 centímetros ancoradas a postes de piñeiro, que mellorará a seguridade e a estética da contorna durante a noite.
