Sanxenxo, 15 de xaneiro de 2026.- Fomentar o vínculo emocional e o contacto entre diferentes xeracións. Este é o obxectivo principal da actividade realizada este Nadal por escolares do colexio de Portonovo e A Florida coas persoas usuarias do Centro de Día Virxe do Carme de Sanxenxo. Esta actividade interxeracional consistiu no intercambio de postais de Nadal, fomentando o contacto entre diferentes xeracións, permitindo que nenos e maiores compartisen desexos e mensaxes de agarimo durante as festas de Nadal.

Esta iniciativa súmase a outras actividades como a realizada o pasado mes de abril polo colexio de Portonovo con motivo do Día do Libro, cando o alumnado se desprazou ata o Centro de Día para realizar lecturas aos maiores de distintos títulos como Paco Trolas, Pétala, O meu avó Carmelo, O moco máis rico do mundo ou Mari Luz avestruz. En definitiva, trátase de realizar actividades que buscan combater a soidade das persoas maiores e enriquecer os valores sociais do alumnado.