Sanxenxo, 16 de abril de 2026.- Tres empresas optan á xestión do Centro de Día Municipal Virxe do Carme. Trátase de Clece Mayores, Emocional Technologies 22 e Sacendi. O servizo saíu a licitación por un importe total de 3,3 millóns de euros, correspondente a un contrato de catro anos.

Esta cifra supón un incremento de 700.000 euros respecto do contrato anterior, destinado principalmente a reforzar o persoal e ampliar as horas en áreas como limpeza, cociña, traballo social e enfermaría.

Actualmente, o centro opera ao máximo da súa capacidade, atendendo a 80 usuarios, e xoga un papel fundamental na conciliación familiar doutras tantas familias.

O servizo ofrece unha atención integral e polivalente, centrada na estimulación da comunicación, o fortalecemento da autoestima e a mellora da calidade de vida dos seus usuarios.

O centro dispón de transporte adaptado, con condutor e auxiliar, para recoller e devolver aos usuarios aos seus domicilios seguindo rutas organizadas polo persoal do centro.

A edificación conta cun baixo dividido en catro áreas claramente diferenciadas: Dirección e administración, estancia, actividades e servizos xerais. Ademais, o recinto inclúe unha parcela axardinada accesible para os usuarios.