Ambas empresas dispoñen de dez días hábiles para entregar a documentación e posteriormente asinarase o contrato

Sanxenxo, 7 de maio de 2026.- O Concello xa ten sendas propostas de adxudicación para a execución da humanización do núcleo rural de Aios e de Camiño do Castro en Dorrón. Ambas actuacións realizaranse con cargo ao Plan +Provincia da Deputación de Pontevedra e fondos municipais. Ambas empresas dispoñen de dez días hábiles para entregar a documentación e, posteriormente, asinar o contrato.

A empresa Castro Figueiro realizará a actuación de calmado de tráfico rodado e a seguridade peonil en Aios por 600.433 euros e 5 meses de execución. O núcleo componse dunhas vinte casas con muros de pedra, así como edificacións auxiliares como alboios, hórreos e un lavadoiro, de alto valor patrimonial. Na actualidade, os viarios teñen anchos desiguais que en moitos casos non son adecuados para unha dobre circulación, onde conviven o tráfico peonil e o rodado nunha situación pouco segura.

O proxecto que abrangue un ámbito de actuación de 2.581 metros cadrados, propón cambiar as redes de electricidade e comunicacións a unhas instalacións adecuadas e eficientes, retirando postes, tendidos aéreos e substituíndo os servizos por uns novos.

En canto aos firmes renovarase o asfalto e formigón por pavimento con pedra, adoquín cerámico, adoquín granítico, pavimentos continuos de formigón desactivado con áridos brancos e negros e formigón puído en seco con áridos brancos.

Ademais, cambiarase a iluminación pública, instalando un total de 20 luminarias sobre fuste e 2 luminarias a nivel do chan ao pé do cruceiro. Tamén se renovará o mobiliario urbano instalando 2 bancos de madeira na praza do cruceiro.

O ámbito de actuación ten un marcado carácter residencial con preferencia peonil e é necesario facilitar a chegada dos residentes ata os seus garaxes co vehículo.

A empresa Audeca encargarase da humanización do Camiño do Castro, en Dorrón, cun investimento de 372.917 euros e un prazo de execución de tres meses e medio. Trátase dunha intervención chamada a transformar por completo o viario, que conecta o núcleo rural do Castro coa estrada PO-308. O actual camiño, con treitos de forte pendente e un firme deteriorado, será renovado na súa totalidade para mellorar a seguridade e a comodidade tanto de peóns como de condutores. Neste sentido, o novo trazado incorporará un pavimento máis resistente, un sistema de drenaxe eficaz e redes actualizadas de saneamento e abastecemento.

Construirase un muro de contención e tamén se ampliará o ancho da calzada, adaptando a vía ás necesidades actuais do tráfico. A seguridade peonil mellorarase coa execución dunha nova varanda e a ampliación parcial do camiño, incorporando unha cesión de terreo, así como sinalización horizontal e vertical. Ademais disto, o proxecto tamén inclúe o soterramento do cableado aéreo, así como a instalación de luminarias de baixo consumo, o que reducirá o impacto visual e permitirá avanzar cara a un modelo enerxético máis eficiente.