A Concellería de Turismo repartirá 5.000 lentes homologadas e un díptico informativo para poder observala con seguridade

Sanxenxo, 30 de xullo de 2026.- O Pazo Emilia Pardo Bazán acollerá o vindeiro xoves 6 de agosto, ás 19:00 horas, unha charla gratuíta sobre a eclipse solar do 12 de agosto. O astrónomo galego Ramón Iglesias Marzoa ofrecerá unha exposición, aberta ás preguntas e dúbidas do público, na que falará do denominado trío ibérico de eclipses, da eclipse que poderá observarse desde Sanxenxo e da importancia de adoptar as medidas de seguridade necesarias para contemplala sen danar a visión.

"En Sanxenxo non se vai facer de noite porque a eclipse non será total, pero poderase ver unha eclipse de ata o 99 %, e as medidas de seguridade deben ser as mesmas que se fose total", advirte.

O Concello de Sanxenxo entregará a cada persoa asistente unhas lentes homologadas para poder gozar da eclipse con total seguridade, así como un díptico informativo. As persoas interesadas en asistir deberán inscribirse previamente a través do correo electrónico Este enderezo de correo está a ser protexido dos robots de correo lixo. Precisa activar o JavaScript para velo. ou no teléfono 986 72 02 85.

Con motivo deste acontecemento astronómico, a Concellería de Turismo encargou 5.000 lentes homologadas, que se repartirán nas oficinas de Turismo de Sanxenxo e Portonovo, así como en distintos edificios municipais, a partir do venres 7 de agosto.